To’o Pangike Pule laiseni ‘a e Pangike Siaina Featured
Dr. Sione Ngongo Kioa Kovana Pangike Pule (To'ohema) mo 'Aisake Tuiono Memipa Poate Kau Talekita PICP (To'omata'u)
Nuku’alofa, 28 Siulai 2016. Kuo tu’utu’uni ‘e he Pangike Pule ‘a Tonga (Tonga Reserve Bank) ke to’o mo fakangata ‘a e laiseni ‘a e Pangike Siaina (Pacific International Commercial Bank) PICB mei ha’ane toe fakahoko ha ngaue faka-pangike ‘i Tonga ni.
Na’e fakaha foki ‘e he Kovana ‘o e Pangike Pule Dr. Sione Ngongo Kioa ki he ongoongo ‘a e Letio Tonga ko e mo’oni ‘a e fakamatala ko’eni pea kuo fakahoko 'a e tu'utu'uni ko'eni.
‘I he fakamatala ‘a Kioa na’a ne fakaha ai ko hono fakangata ko’eni ‘a e laiseni ‘a e Pangike Siaina ‘oku makatu’unga ia ‘i he ‘ikai kenau fakakato ‘enau ngaahi palomesi ki he sevesi tenau fakahoko ki he kakai ‘o e fonua ‘o fakatatau ki he ngaahi makatu’unga na’e ‘uhinga ai hono foaki ‘enau laiseni.
Na’e pehe ‘e Kioa na’e fakahu ange ki he Poate ‘a e Pangike Pule ha palani pisinisi faka’ofo’ofa mo’oni ‘e ‘Aisake Tuiono ko e taha ‘o e kau Talekita ‘o e PICB pea mo Mishka Tu’ifua ko e Pule ‘o e Pangike ni pea na’e makatu’unga ai hono tali ke foaki ‘enau laiseni ‘i he ta’u 2013. Ko e pango he na’e ‘ikai ke fakahoko ‘a e palani ko’eni pea kuopau ai ke fakahoko ‘a e tu’utu’uni ia ‘a e lao fakatatau ki he fakamatala ‘a Kioa.
Ko e konga ‘o e palani ko’eni fakatatau ki he fakamatala ‘a Kioa ko hono holoki ‘a e totongi tupu ki hano totongi fakafoki ha no pa’anga mei he Pangike PICB ki he peseti pe ‘e 6 ‘o kau ai ‘a e ngaahi penefiti kehe ‘o fakahoa ki he ngaahi Pangike ‘oku nau fakahoko fatongia ‘i Tonga ni hange ko e ANZ, BSP, Pangike Fakalakalaka mo e MBf.
‘I ha fakamatala ‘a ‘Aisake Tuiono na’e tuku mai ‘i he Letio Tonga ai pe na’a ne fakafepaki’i lahi ‘a e fakamatala ‘a Kioa pea na’e pehe ‘e Tu’iono ko e tu’utu’uni ko’eni ‘a e Pangike Pule ‘oku ‘ikai fakalao. Na’a ne hoko atu ‘o pehe ‘oku ‘i ai ‘a e tu’utu’uni ‘a e lao kuopau ke tukuange ha tohi fakatokanga ‘o fakaha ange ai ‘a e ngaahi fiema’u kenau fakakakato mo e PICB pea ‘i he ‘aho ‘e 10 kuopau kenau fakakato (comply) ‘a e ngaahi fiema’u koia.
Kapau leva ‘e ‘ikai pea toki malava leva mei heni ke fakangata ‘enau laiseni ‘o fakatatau ki he lao. 'I he lau 'a Tuiono na'e 'ikai ke fakahoko 'e he Pangike Pule 'a e tu'utu'uni ko'eni 'a e lao.
Na’e fakaha foki ‘e Kioa ia na’e ‘osi fakahoko ‘a e tohi fakatokanga ki he PICB ‘i he ta’u 2015 pea ‘oku makatu’unga mei heni ‘a e tu’utu'uni ko’eni ka 'oku faka'ikai'i fefeka 'eni 'e Tuiono mo e PICB.
'Oku te'eki ke mahino pe ko e ha e tu'unga 'e hoko atu kiai 'a e fetukuaki ko'eni.
