Fakalelei ki he International Dateline Hotel Featured
Nuku’alofa, 29 ‘Epeleli 2016. ‘Oku hokohoko lelei atu ai pe foki ‘a e ngāue ki hono fakalelei ‘o e Hotele International Dateline ‘a ia ‘oku fakafuofua ‘e kamata ngāue’aki ‘a e Hotele ni ‘i he konga ki mui ‘o e ta’u ni 2016.
‘Oku fakahoko foki ‘a e ngāue ko’eni ‘e he Kautaha Fisi ko e Tanoa Hotel Group ‘a ia ‘oku nau lisi ‘a e Hotele mei he Pule’anga Tonga. Kuo mahino mai foki kuo liliu mo e hingoa 'o e hotele ki he Tanoa International Dateline Hotel pea koe konga pe 'eni 'a e femahino'aki mo e Pule'anga Tonga 'i hono lisi atu ko'eni 'o e hotele. 'Oku lau miliona foki 'a e fakamole ki he ngāue ko'eni.
‘Oku fakafiefia foki ‘a hono toe fakaake mo fakalelei mai ‘a e ‘aikoni (icon) na’e ‘ilo ‘aki ‘a e fonua pea ko e Hotele Dateline foki na’e ‘ilo ‘aki ‘a Tonga talu ‘ene tu’u mai mei he ta’u onongufulu tupu. Ko e senitā foki ‘eni ki he folau’eve’eva kae pehe ki he ngaahi fakataha’anga lalahi ‘a e fonua ‘o kau kiai mo e ngaahi fakataha mei Tu’apule’anga na’e fakahoko mai ki Tonga ni.
‘Oku lahi foki ‘a e ngaahi ta’anga na’e fa’u ko hono vikia ‘a e Hotele Dateline pea ‘oku ‘i ai ‘a e ‘amanaki lelei ‘a e sekitoa Takimamata ki hono toe fakafoki ko’eni ‘a hotele ki he tu’unga na’e anga maheni kiai ‘a e fonua he kuohili.
‘Oku kau foki ‘a e hotele he ngaahi fiema’u lalahi ‘i he sekitoa Takimamata he ‘oku kaunga ‘a e lahi ange ‘a e ngaahi loki ke nofo ai ‘a e kau folau’eve’eva ‘i hono fakakaukau’i ke fakahoko mai ‘a e ngaahi fakataha lalahi ki Tonga ni.
