“ KĀTAKI "Oua-e-fiu." 'Oku 'ikai kau e faka-lele pisinisí 'i he fatongia 'o e Pule'angá. 'Oku fe'au'auhi 'a e sekitoa pisinisí ke faka-lakalaka 'a e kanolelei 'o e ngaahi koloa mo honau ngaahi fatongia (service) ki he kakaí (corporate social responsibilities).
Ngata 'i he kau tau malu'ifonuá, kau pollsí, mo e mo'ui lelei 'oku tuku ki he Pule'angá. 'Oku kei kau 'a e Potungāue Akó 'i he fatongia 'o e Pule'angá he 'oku tu'utu'uni 'e he lao 'o e fonuá. 'Oku fe'au'auhi 'a e ngaahi apiako 'a e ngaahi siasí, ka 'oku mālohi ange pē 'a e ivi faka-pa'anga 'o e Pule'angá.
'Oku kei ta'e faka-temokalati 'a e ngaahi pisinisi 'a e Pule'angá hangē ko e Tonga Broadcast Commission ko e "quasi-monopoly." Neongo kuo faka-ngofua 'a e ngaahi letiō mo e TV tau'atāiná, ka 'oku nau kei fe'auhi kinautolu mo e Letiō/TV Tongá, 'a ia 'oku faka-pa'anga 'e he Pule'angá.
Ko e potungāue vaí mo e 'uhila ko e ongo "monopoly." 'Oku 'ikai ma'u faingamālie 'a e kakaí kotoa (egalitarianism) 'i hono faka-lele 'e he Pule'angá. 'O kapau 'e fakalele 'e he Pule'angá, pea 'oku totonu ke tufa ke ma'u faingamālie 'a e Tonga kotoa, 'o kau ai mo e kakai masivá ke tatau mo e Malu'i Fonuá, Polisi, mo e Potungāue Mo'ui Lelei.
'Oku ta'e faka-temokalati 'a hono pule'i 'e he tokosi'i (poate) 'a e vai mo e 'uhila 'a e kakai toko-laukilu. Pea 'oku 'ikai totonu ke ma'u pa'anga faka-tupu 'a e Pule'angá mei he kakaí. ”